Málþing 9. maí 2014

Rannsóknarstofa í tónlistarfræðum

heldur málþing í Sölvhóli við LHÍ

föstudaginn 9. maí 2014

Kl. 13:00-16:00

Á VÆNGJUM HINS ÓÁÞREIFANLEGA

-TÓNLIST, MENNING OG ARFUR

Fjallað verður um tónlistina sem menningararf frá ýmsum hliðum

Áhugarverð erindi, tónlistarflutningur, spjall og veitingar í boði Rannsóknarstofunnar

Fram koma

Valdimar Tr. Hafstein

Sigríður Aradóttir

Helga Rut Guðmundsdóttir

Berglind María Tómasdóttir

Spilmenn Ríkínís

 

Allir velkomnir!

 

Nánar um Dagskrá:

Valdimar Tr. Hafstein, dósent

Flug kondórsins: Menningararfur, menningarvernd og menningarþjófnaður

„El Condor Pasa“ varð heimsfrægt í flutningi Simon and Garfunkel árið 1970, en lagið á sér merkilega sögu bæði fyrir og eftir þessa frægustu útgáfu þess. Í fyrirlestrinum verður slóð kondórsins rakin frá Andes fjöllum til evrópskra og bandarískra stórborga; frá Teatro Mazzi í Líma til dansklúbba í París; frá panflautu til píanós og frá symfoníusveitum til diskóteksins; frá frumbyggjatónlist til popptónlistar; og frá heimstónlistarsenunni til þjóðlegs menningararfs. Á meðal helstu persóna og leikenda eru, auk þeirra Paul Simon og Art Garfunkel: tónskáldið Daniel Alomía Robles, hljómsveitin Los Incas, Cerro de Pasco Koparkompaníið, Victor Talking Machine Corporation, Falangista-Sósíalistaflokkur Bólivíu, Chuck Berry og UNESCO, Menningarmálastofnun Sameinuðu þjóðanna. Fyrirlesturinn gerir uppruna sáttmálans um verndun óáþreifanlegs menningararfs að rannsóknarefni og sögur sem sagðar eru af honum, ásamt hugmyndum um menningareign og menningareigendur. Meginmarkmið fyrirlestrarins er að skoða sambandið á milli menningarverndar og menningarþjófnaðar.

 

Sigríður Aradóttir

Trommusöngvar og kvæðamenn, svanasöngur og upprisa, epli og appelsínur...

 

Þjóðtónlist Íslendinga annars vegar og Grænlendinga hins vegar eru tvær áhugaverðar en ólíkar tónlistargreinar. Hvað geta þessar tónlistargreinar mögulega átt sameiginlegt? Hvað er það sem helst skilur á milli? Hvernig er grænlensk þjóðtónlist og hvað er þjóðtónlist yfir höfuð? Hér verður með augum hinnar þverfaglegu greinar menningarstjórnunar reynt að finna svör við þessum spurningum. Stiklað verður á stóru um hugtakið þjóðtónlist, tæpt á því hvað felst í þjóðtónlist þjóðanna tveggja og þessar tónlistargreinar skoðaðar út frá sögunni en einnig sem parti af nútímanum og það sem einkennt hefur ferð þeirra frá fortíð til nútíðar sem og birtingarmynd í menningu samtímans.

 

Helga Rut Guðmundsdóttir, lektor

Uppáhaldssöngvar: Rannsóknir á söngvum íslenskra leikskólabarna

 

Í rannsóknum á söngfærni leikskólabarna undanfarin ár hefur upptökum verið safnað með söng 3-6 ára barna. Stuðst hefur verið við alþjóðlegt söngfærnipróf ATBSS sem lagað hefur verið að ungum börnum. Skýrt verður stuttlega frá því hvernig þessar rannsóknir stuðla að samanburði á söngfærni barna milli landa og hvernig íslensk börn koma út í samanburði við börn í öðrum löndum. Í erindinu verður greint frá því hvaða sönglög 3-6 ára íslensk börn velja sér að syngja þegar þau syngja lag að eigin vali.

 

Berglind María Tómasdóttir

Í leit að tónlistarlegu sjálfi 

Rockriver Mary er heiti á tónlistarlegu hliðarsjálfi sem ég hef komið fram undir á undanförnum árum. Hún á sér tvær birtingarmyndir sem byggðar eru á þjóðlegum erkitýpum: Annars vegar er hún amerískur kúreki og hins vegar íslensk fjallkona. Í erindinu mun ég gera grein fyrir tilurð Rockriver Mary og tilvistarkreppu klassíska hljóðfæraleikarans sem leitar að tónlistarlegu sjálfi. 

Berglind María Tómasdóttir er flautuleikari sem vinnur þvert á marga miðla. Í verkum sínum leitast hún við að kanna sjálfsmyndir og erkitýpur. Hún hefur unnið talsvert með vídeólist, leikhús og tónlist í performönsum sínum svo sem í hennar rómaða I’m an Island. Berglind María hefur komið fram á Listahátíð í Reykjavík, Bang on a Can maraþoninu í San Francisco, Sumartónleikum í Skálholtskirkju, CMMAS tölvutónlistarsetrinu í Morelia í Mexíkó, Myrkum músíkdögum, MSPS New Music Festival í Shreveport, Louisiana,  REDCAT í Los Angeles og Nordic Music Days svo fátt eitt sé nefnt. Hún hefur jafnframt leikið inn á fjölda hljóðrita, meðal annars sem einleikari ásamt Sinfóníuhljómsveit Íslands undir stjórn Vladimir Ashkenazy. Berglind stundaði nám í flautuleik við Tónlistarskólann í Reykjavík og Konunglega danska konservatoríið. Hún lauk nýverið doktorsprófi í flutningi samtímatónlistar frá Kaliforníuháskóla í San Diego.

 

 

Spilmenn Ríkínís: Marta Guðrún Halldórsdóttir og Örn Magnússon

 

Rætt verður  um nálgun tónlistarmannsins flytjandans við þjóðararfinn og hvaða áskoranir felast í því að endurlífga og flytja gamla tónlist. Erindið verður borið fram með lifandi tónlistarflutningi.

 

 

Þú ert að nota: brimir.rhi.hi.is