Í þessari skýrslu er fjallað um helstu niðurstöður könnunar á viðhorfum til námsleiðarinnar Fagháskólanám í leikskólafræði. Samstarfsverkefni Háskóla Íslands og Háskólans á Akureyri sem nefnist Fagháskólanám í leikskólafræði á landsvísu, er grundvöllur þess að námsleiðin varð til. Árið 2022 var undirrituð viljayfirlýsing um þróun og innleiðingu fagháskólanáms í leikskólafræði með það að markmiði að efla menntun starfsfólks leikskóla um allt land (Stjórnarráð Íslands, 2022). Fagháskólanámið er þróunarverkefni, styrkt úr sjóðnum Samstarf háskóla á vegum Menningar-, nýsköpunar- og háskólaráðuneytis, og unnið í samvinnu HA og HÍ við sveitarfélög víða um land. Námsleiðin er 60 eininga grunndiplóma fyrir þau sem hafa lokið námsbraut fyrir leikskólaliða eða leikskólabrú á framhaldsskólastigi (Háskóli Íslands, e.d.). Námið er skipulagt sem hálft nám með vinnu í leikskóla í tvo vetur og kennt í blöndu af stað- og fjarnámi. Fyrsti hópur nemenda hóf nám haustið 2023 og útskrifaðist vorið 2025. Annar hópur nemenda hóf nám haustið 2024 og áætlað er að hann útskrifist vorið 2026. Könnunin var framkvæmd í júní 2025 og náði til beggja nemendahópa, leikskólastjóra og tengiliða sveitarfélaga en einnig voru tekin viðtöl við verkefnisstjóra námsleiðarinnar við Háskóla Íslands og við Háskólann á Akureyri. Markmið könnunarinnar er að safna reynslu og viðhorfum nemenda, leikskólastjóra og tengiliða sveitarfélaga til Fagháskólanámsins og munu niðurstöðurnar nýtast til að meta námsleiðina Fagháskólanám í leikskólafræði og styðja við áframhaldandi þróun hennar. Í stjórn verkefnisins Fagháskólanám í leikskólafræði á landsvísu sitja Kristín Jónsdóttir dósent við HÍ formaður, Ingibjörg Ósk Sigurðardóttir dósent við HÍ, Védís Grönvold kennslustjóri Menntavísindasviðs HÍ, Guðmundur Engilbertsson lektor við HA, Rannveig Oddsdóttir dósent við HA og Heiða Kristín Jónsdóttir skrifstofustjóri Hug- og félagsvísindasviðs HA. Verkefnisstjórar voru Anna Gréta Guðmundsdóttir við HÍ og Alda Stefánsdóttir við HA. Könnunin og skýrsla þessi voru unnar að beiðni stjórnarinnar.