SAGA

Kæra starfsfólk Menntavísindasviðs. 

Mikið er gott að sjá ykkur öll í Sögu þessa dagana. Nú er margt á döfinni og hér kemur það helsta sem tengist rannsóknum. 

Menntakvika   

Menntakvika, árleg ráðstefna í Menntavísindum verður haldin 2.- 4. október 2025 í nýju húsnæði Sögu! Dagskráin er komin út og við hvetjum öll til að mæta!   

Dagskrá Menntakviku 2025 

  • 2. október kl. 14:30-16:00 - Opnunarmálstofa Menntakviku: Kennaramenntun í deiglunni - Hvar stöndum við? Stofa 114, 1. hæð í Sögu. Fundurinn verður einnig í streymi. Sjá nánar dagskrá opnunarmálstofu Menntaviku 

  • 3. október kl. 9:00-17:00 í Sögu - Ráðstefna: Málstofur og erindi Menntakviku - Sjá dagskrá ráðstefnu hér. Málstofur og erindi verða aðgengileg í gegnum zoom.   

Rannsóknasjóður Háskóla Íslands - frestur til 20. október!  

Umsóknarfrestur í Rannsóknasjóð Háskóla Íslands er til 20. október nk. Hlutverk sjóðsins er að efla rannsóknastarfsemi HÍ og við hvetjum akademískt starfsfólk og aðjúnkta I til að sækja um í sjóðinn. Sjá allar upplýsingar og leiðbeiningar um umsókn á vef Rannsóknasjóðs.   

Vegvísar í rannsóknum  

Vegvísar í rannsóknum Menntavísindasviðs eru komnir út og taka við af fyrri rannsóknastefnu sviðsins. Vegvísarnir byggjast á stefnu Háskóla Íslands – HÍ26, starfsáætlun sviðsins, sjálfsmati og stefnumótunarvinnu sem hefur átt sér stað innan sviðsins undanfarin misseri.  

Í þessu stefnuskjali er komið inn á traust, stuðning, alþjóðatengsl, sjálfbærni og tengsl rannsókna og kennslu og eru markmið sett fram um eflingu rannsókna og sýnileika þeirra.  

Vegvísarnir eru aðgengilegir á íslensku og ensku á Uglu og á vef Menntavísindastofnunar og verða einnig innrammaðir uppi á vegg á öllum hæðum Sögu.   

Rannsóknavirkni Menntavísindasviðsfólks eykst á milli ára  

Rannsóknarstigum starfsfólks Menntavísindasviðs hefur fjölgað á milli ára en 13% aukning varð á heildarrannsóknarstigum sviðsins á milli áranna 2023 og 2024, þar af 14,5% aukning á aflstigum á milli áranna. Einnig hefur umsóknum sviðsfólks í alþjóðlega rannsóknarsjóði fjölgað. Á þessu ári eru þegar farnar 48 umsóknir í alþjóðlega rannsóknarsjóði miðað við 40 umsóknir allt árið í fyrra og 32 umsóknir árið 2023. Þetta eru t.d. umsóknir í Horizon Europe, NordForsk og Erasmus+, bæði til Landskrifstofu og Brussel.  Vel af sér vikið hjá Menntavísindasviðsfólki!    

Nýjar greinar í NETLU   

Kunna öll börn stafahljóðin í upphafi 2. bekkjar? Áhrif sumarfrís, móðurmáls, kyns og stafaþekkingar við upphaf grunnskóla. Höfundar eru Jóhanna María Bjarnadóttir, Guðrún Lilja Kristófersdóttir, Auður Soffíu Björgvinsdóttir, Anna-Lind Pétursdóttir og Amelia Jara Larimer.  Þú getur lesið greinina hér   

Leikskóli fyrir öll börn: Valdefling foreldra og deildarstjóra. Höfundar eru Anna Magnea Hreinsdóttir og Jóhanna Einarsdóttir.   Þú getur lesið greinina hér  

Vertu tímanlega að setja efnið þitt inn á IRIS  

Vertu tímanlega í að uppfæra efnið þitt inn á IRIS til að flýta fyrir stigamati í febrúar. Þú getur alltaf haft samband við annabjarnadottir@hi.is ef þig vantar aðstoð.  

Við getum aðstoðað þig   

Við minnum á beiðnakerfi Menntavísindastofnunar og vefinn okkar þar sem ýmsar gagnlegar upplýsingar er að finna  

Útgefið efni   

Nýtt útgefið efni Menntavísindasviðs 2025 má nálgast í rannsóknagáttinni  - IRIS  

Listi yfir rannsóknarverkefni innan Menntavísindasviðs er að finna á https://mvsrannsoknir.hi.is/  

Allar birtar greinar frá Netlu og TUM eru aðgengilegar í opnum aðgangi á heimasíðum ritanna Netla.hi.is og TUM.hi.is     
Share