Innlend rannsóknaverkefni
Rannveig Björk Þorkelsdóttir og Jóna Guðrún Jónsdóttir, hófu samstarf við fræðsludeild Þjóðleikhússins haustið 2021. Samstarfið miðar að því að auka aðgengi nemenda í grunnskólum að barnaleikhúsi og kennsluefni fyrir kennara og um leið að auka möguleika barna til að njóta tungumáls frá unga aldri. Það hjálpar þeim ennfremur að læra ný hugtök og styrkir tilfinningu þeirra fyrir tungumálinu.
Allt námsefni sem samið er í samstarfinu er sett á vefinn https://leikumaflist.com sem er kennslu– og veffræðaumhverfi á sviði kennslu og rannsókna í leiklist en þar er nú þegar safn af verkum nemenda og kennara ásamt fjölda rannsókna og heildstæðra ferla í leiklist. Vefsíðan er opin öllum sem vilja kynnast og nota leiklist og netmiðla.
Markmið rannsóknarinnar er tvíþætt. Annars vegar að skoða starfsþróun þeirra leiklistarkennara sem hafa útskrifast sem leiklistarkennarar frá HÍ og hins vegar að fá betri innsýn í leiklistarkennslu á vettvangi. Mikilvægt er að skoða þetta tvennt saman með uppbyggingu kennaramenntunar í huga.
_____________
Umskipti frá menntun, frá því að vera nemi yfir í atvinnulífið, er alltaf áskorun. Fyrir kennarastéttina virðist skrefið frá menntun til starfa jafnvel enn meira krefjandi en í öðrum starfsgreinum þar sem kennsla er í auknum mæli viðurkennd sem flókið og krefjandi starf. Kennarar upplifa meiri streitu og kulnun en aðrar starfsstéttir (Watt og Richardson, 2014; Watt, Richardson og Smith, 2017). Það er líka algeng reynsla nýliða í almennri kennslu að fyrsta árið í kennslu sé krefjandi og margir kennarar hætta störfum eftir fyrsta árið (sjá t.d. Leenders, De Jong og Van Tartwijk 2003; Smith o.fl. 2014; Watt og Richardson 2014; Välijärvi og Heikkinen 2012; Hildur Hauksdóttir, 2016; OECD, 2014).
Árið 2013 kom út ný aðalnámskrá grunnskóla á Íslandi. Þar var m.a. tilgreind skipting í greinasvið og leiklist skilgreind sem sérstakt fag í fyrsta skipti. Í kjölfarið myndaðist nokkur spenna í sambandi við það hvort skólarnir gætu kennt þetta nýja fag; hvort hæfir kennarar fengjust til starfa og hvort leiklistin næði góðri fótfestu. Ísland er í fararbroddi þegar kemur að listgreinum í grunnskóla. Það er eitt af örfáum löndum í Evrópu sem hefur leiklist sem grein í aðalnámskrá og aðrar þjóðir horfa til Íslands með hvernig til tekst við innleiðingu leiklistar sem kennslugreinar. Því er mikilvægt að hlúa að faginu (Rannveig Björk Þorkelsdóttir, 2021).
Vísindalegur ávinningur er m.a. fólginn í því að efla listkennslu í skólakerfinu og stuðla að rannsóknum á sviði kennslufræða og lista. Rannsakandi telur nauðsynlegt að skoða hvort og þá hvernig starfsþróun kennara fari fram og mikilvægt sé að styðja nýja kennara í starfi. Að koma inn í kennslu og hafa engan stuðning, eins og rannsóknir hafa sýnt fram á að gerist, getur leitt til þess að kennarinn hreinlega brennur út og hættir í starfi. Rannsókn sem þessi getur nýst öllum list- og verkgreinakennurum sem starfa í grunnskólum, þar sem list- og verkgreinakennarar eru í raun einyrkjar í sínu starfi. Þá getur rannsóknin einnig nýst háskólakennurum sem vilja efla samstarf við kennara á vettvangi með gæði í menntun kennara í huga.
Sjá nánar á mvs rannsóknir
Jóna Guðrún Jónsdóttir
Erlend rannsóknaverkefni
Verkefnið Sjávarsögur: Að stuðla að haflæsi og sjálfbærni í skólasamfélögum (e. Promoting Ocean Literacy and Environmental Sustainability in School Communities) er samstarfsverkefni fjögurra Evrópuþjóða: Íslands, Grikklands, Rúmeníu og Portúgals.
Í verkefninu er leitast við að styðja kennara í grunn- og framhaldsskólum til að þróa og auka þekkingu sem gerir þeim kleift að innleiða menntun á sviði haflæsis í gegnum leiklist og kynna þannig fyrir nemendum hugmyndafræði og verklag sem getur stuðlað að því að byggja upp kynslóð haflæsra, framtakssamra og ábyrgra borgara, samfélaginu til heilla.
Markmiðið með Sjávarsögum er að brúa bil þekkingar á haflæsi með því að búa til nýstárlegt og aðgerðamiðað fræðsluefni fyrir skólasamfélagið til að styðja við grunn- og framhaldsskólakennara og nemendur þeirra. Jafnframt til að skilja hvernig við sem einstaklingar höfum áhrif á hafið og hvernig hafið hefur áhrif á okkur, sem er kjarni hæflæsis.
Verkefnið er styrkt af Evrópusambandinu og stendur yfir í 24 mánuði (01/10/2023 – 30/09/2025)
Heimasíða verkefnis https://www.sea-tales.eu/
Um verkefnið á mvs rannsóknir